கீழிடைவெளி இரு முயல்கள் Downside gap two Rabbits

            இது மேலிடைவெளி இரு காகங்களுக்கு எதிரான மூவுலக்கை காளை ஒழுங்காகும். இது பார்ப்பதற்கு காலையில் விண்மீன் மற்றும் விழுங்கி போல்  தோன்றும் ஆனால் குறிப்பிடத்தக்க வேறுபாடு உண்டு. முதல் உலக்கை கருப்பு நிறத்தில் இருக்க வேண்டும். இரண்டாம் உலக்கை முதல் உலக்கையின் முடிவிலிருந்து இடைவெளி விட்டு கீழாக தொடங்க வேண்டும் இது வெள்ளை நிறத்தில் இருக்க வேண்டும் இதன் முடிவு முதல் நாள் உலக்கையின்  முடிவை விட  கீழாக இடைவெளியுடன் இருக்க வேண்டும். மூன்றாவது உலக்கையும் கருப்பு நிறத்தில் இரண்டாம் நாள் உலக்கையை விழுங்குவது போல் (2-ஆம் நாள் உலக்கையின் தொடக்கமும் முடிவும் 3-ஆம்நாள் உலக்கையின் தொடக்கம் & முடிவுக்குள்  இருக்க வேண்டும்.  ) இருக்க வேண்டும்.

* முதல் நாள் நீளமான கருப்பு உடல்   இருக்க வேண்டும்.
* இரண்டாம் நாள் முதல் நாளின் முடிவிலிருந்து இடைவெளி விட்டு கீழாக தொடங்க வேண்டும். இதன் முடிவும் முதல் நாளின் முடிவை விட கீழே இடைவெளியுடன் முதல் நாள் உடலை தொடாமல் இருக்க வேண்டும். இரண்டாம் நாளின் உடலின் நிறம் வெள்ளையாக இருக்க வேண்டும் (காலையில் விண்மீன் நினைவுக்கு வருதா?)
* மூன்றாவது நாளின் உடலின் நிறமும் வெள்ளையாக இருக்க வேண்டும்,  இது  இரண்டாம் நாள் உடலை விழுங்குவது போல் இருக்க வேண்டும். அதாவது 2-ஆம் நாள் உடலின் தொடக்கமும் முடிவும் 3-ஆம் நாள் உடலின் தொடக்கம் & முடிவுக்குள்  இருக்க வேண்டும்.

மேலிடைவெளி இரு காகங்கள் The Upside Gap Two Crows

            இது மூவுலக்கை கரடி ஒழுங்காகும். இது பார்ப்பதற்கு மாலையில் விண்மீன் மற்றும் விழுங்கி போல்  தோன்றும் ஆனால் குறிப்பிடத்தக்க வேறுபாடு உண்டு. முதல் உலக்கை வெள்ளை நிறத்தில் இருக்க வேண்டும். இரண்டாம் உலக்கை முதல் உலக்கையின் முடிவிலிருந்து இடைவெளி விட்டு மேலாக தொடங்க வேண்டும் இது கருப்பு நிறத்தில் இருக்க வேண்டும் இதன் முடிவும் முதல் நாள் உலக்கையின் முடிவை விட  மேலாக இடைவெளியுடன் இருக்க வேண்டும். மூன்றாவது உலக்கையும் கருப்பு நிறத்தில் இரண்டாம் நாள் உலக்கையை விழுங்குவது போல் (2-ஆம் நாள் உலக்கையின் தொடக்கமும் முடிவும் 3-ஆம்நாள் உலக்கையின் தொடக்கம் & முடிவுக்குள்  இருக்க வேண்டும்.  ) இருக்க வேண்டும்.

* முதல் நாள் நீளமான வெள்ளை உடல்
* இரண்டாம் நாள் முதல் நாளின் முடிவிலிருந்து இடைவெளி விட்டு மேலாக தொடங்க வேண்டும். இதன் முடிவும் முதல் நாளின் முடிவை விட இடைவெளியுடன் முதல் நாள் உடலை தொடாமல் இருக்க வேண்டும். இரண்டாம் நாளின் உடலின் நிறம் கருப்பாக இருக்க வேண்டும் (மாலையில் விண்மீன் நினைவுக்கு வருதா?)
* மூன்றாவது நாளின் உடலின் நிறமும் கருப்பாக இருக்க வேண்டும்,  இது  இரண்டாம் நாள் உடலை விழுங்குவது போல் இருக்க வேண்டும். அதாவது 2-ஆம் நாள் உடலின் தொடக்கமும் முடிவும் 3-ஆம் நாள் உடலின் தொடக்கம் & முடிவுக்குள்  இருக்க வேண்டும்.

விழும் மூவுலக்கை வழிமுறை The Falling Three Methods

              மேலெழும் மூவுலக்கை வழிமுறைக்கு எதிரான கரடி ஒழுங்கு இது. இதன் முதல் உலக்கையின் உடல் நீளமான கருப்பு நிறமுடையது. அதற்கு அடுத்து வரும் மூன்று அல்லது அதிகமான உலக்கைகளின் நிறம் வெள்ளை  நிறமுடையது (பொதுவாக மூன்று உலக்கைகள் தான் இருக்கும்) இந்த வெள்ளை நிற  உலக்கைகள் முதலில் தோன்றிய நீளமான  கருப்பு  உலக்கையின்  முடிவை தொடாது. அதாவது   அவை முதல் உலக்கையின் உடலின் தோற்றம் முடிவுக்குள் தான் அடங்கி இருக்கும். இந்த வெள்ளை நிற உடல்களுக்கு அடுத்து கருப்பு உடல் தோன்ற வேண்டும். இந்த கருப்பு உடல் நீளமாகவும் இதன் முடிவு முதல் கருப்பு உடலின் முடிவை விட  குறைவாக இருக்க வேண்டும்.

முதல் உலக்கையின் உடலின் நிறம் கருப்பு இது நீளமானது.
இரண்டாம் மூன்றாம் நான்காம் உலக்கைகளின் உடலின் நிறம் வெள்ளை இவை சிறிய நீளமுடையவை.
ஐந்தாம் உலக்கையின் உடலின் நிறம் கருப்பு  இதுவும் நீளமானது.

சமிக்கையை அதிகபடுத்தும் செயல்கள்

* இந்த ஒழுங்கு இறங்கு முகத்தில் தோன்ற வேண்டும்.
* முதல்  உலக்கையின் கருப்பு நிற உடலுக்கு சிறிய குச்சிகள் இருக்க வேண்டும்.

ஏன் இந்த ஒழுங்கு வேலை செய்யுமுன்னு நினைக்கறாங்க?

காளைகளை அமுக்கி விட்டு கரடிகள் செல்வாக்கடைவதை நீண்ட கருப்பு நிற உடல் தெரிவிக்கிறது. விட்டேனா பார் என்று காளைகள்  மெதுவாக மூன்று   நாள்கள் எழும் நான்காவது நாள் காளையின் தலையில் நங்கென்று குத்தி கரடி பெரிதாக மேலெழும். இது காளைகளை அமுக்கி மேலும் வாலாட்ட முடியாதவாறு செய்துவிடும்.

மேலெழும் மூவுலக்கை வழிமுறை The Rising Three Methods

இதொரு காளை ஒழுங்காகும். இது ஐந்து உலக்கைகளை கொண்டு தீர்மானிக்கப்படுகிறது. இதன் முதல் உலக்கையின் உடல் நீளமான வெள்ளை நிறமுடையது. அதற்கு அடுத்து வரும் மூன்று அல்லது அதிகமான உலக்கைகளின் நிறம் கருப்பு நிறமுடையது (பொதுவாக மூன்று உலக்கைகள் தான் இருக்கும்) இந்த கருப்பு நிற  உலக்கைகள் முதலில் தோன்றிய நீளமான  வெள்ளை உலக்கையின்  முடிவை தொடாதுஅமாவது   அவை முதல் உலக்கையின் உடலின் தோற்றம் முடிவுக்குள் தான் இருக்கும். இந்த கருப்பு நிற உடல்களுக்கு அடுத்து வெள்ளை உடல் தோன்ற வேண்டும். இந்த வெள்ளை உடல் நீளமாகவும் இதன் முடிவு முதல் வெள்ளை உடலின் முடிவை விட  அதிகமாகவும் இருக்க வேண்டும்.

• முதல் உலக்கையின் உடலின் நிறம் வெள்ளை இது நீளமானது.
• இரண்டாம் மூன்றாம் நான்காம் உலக்கைகளின் உடலின் நிறம் கருப்பு இவை சிறிய நீளமுடையவை.
• ஐந்தாம் உலக்கையின் உடலின் நிறம் வெள்ளை இதுவும் நீளமானது.

சமிக்கையை அதிகபடுத்தும் செயல்கள்

* இந்த ஒழுங்கு ஏறு முகத்தில் தோன்ற வேண்டும்.
* முதல்  உலக்கையின் வெள்ளை நிற உடலுக்கு சிறிய குச்சிகள் இருக்க வேண்டும்.

ஏன் இந்த ஒழுங்கு வேலை செய்யுமுன்னு நினைக்கறாங்க?

கரடிகளை அமுக்கி விட்டு காளைகள் செல்வாக்கடைவதை நீண்ட வெள்ளை நிற உடல் தெரிவிக்கிறது. விட்டேனா பார் என்று கரடிகள்  மெதுவாக மூன்று   நாள்கள் எழும் நான்காவது நாள் கரடியின் தலையில் நங்கென்று குத்தி காளை பெரிதாக மேலெழும். இது கரடிகளை அமுக்கி மேலும் வாலாட்ட முடியாதவாறு செய்துவிடும்.

மூன்று காகங்கள் (Three black crows)

காளையான மூன்று வெள்ளை படை வீரர்களுக்கு எதிரான கரடி ஒழுங்கு இது.

1. வரிசையா மூன்று  நாள்கள் கருப்பு உடல் தோன்றும்.  ஏறு முக போக்கின்  கடைசி உலக்கையின் உடலின் நிறம் கருப்பாக இருக்கும் இதை முதல் உடல் என்போம்..
2. அடுத்த நாள் அதாவது இரண்டாம் நாள் உடலின் விலை தொடக்கமும்   முடிவும் முந்தைய நாள் உடலின் விலை தொடக்கம்  மற்றும்  முடிவை விடகுறைவாக இருக்க வேண்டும்.
3. அதேபோல் மூன்றாம் நாளின் உடலின் விலை தொடக்கமும்   முடிவும் முந்தைய நாள் உடலின் விலை தொடக்கம்  மற்றும்  முடிவை விடகுறைவாக இருக்க வேண்டும்.

சமிக்கையை அதிகப்படுத்தும் செயல்கள்

* முதல் நாள் உடலை விட பெரிதாக (நீளமாக) இரண்டாம் நாள் உடல் இருக்க வேண்டும்
* இரண்டாம் நாள் உடலும் மூன்றாம் நாள் உடலும் கிட்டத்தட்ட ஒரே நீளத்தில் இருக்க வேண்டும். அப்படி இருந்தால் கரடியின் செல்வாக்கு உள்ளதாக கருதலாம்.
* குச்சிகள் மிக சிறிதாகவோ இல்லாமலோ இருக்க வேண்டும்
* தெளிவான ஏறு முக போக்கில் இந்த ஒழுங்கு தோன்ற வேண்டும்.
* உடல்களின் நீளம் அதிகமாக இருப்பது இதன் வீரியத்தை காட்டும்   அறிகுறி.
* வாங்கல் விற்றல் அதிகமாக நடந்திருக்க  வேண்டும்.

ஒழுங்கைப்பற்றிய சில குறிப்புகள்

**  மூன்றாம் நாள் உடலின் நீளம் மற்ற இரு நாள்களை விட சிறிதாக இருந்தால் தவிர்ப்பது நலம்.

 **  நெடிய ஏறு முக போக்கின் பின் மூன்று காகங்கள் தோன்றுவது சில மாதங்கள் பங்கை வைத்திருந்து விற்பவர்களுக்கு ஏற்றது.

ஏன் இந்த ஒழுங்கு  வேலைசெய்யுமென்று   நினைக்கிறார்கள்?

நெடிய ஏறு முக போக்கின் போது காளைள்  சோர்வடைந்து கரடிகள் வீரியத்துடன் விலையை குறைக்கும். தொடர்ந்து மூன்று நாள்கள் விலை இறங்குவது சந்தையின் போக்கு மாற்றம் அடைகிறது  என்பதை உணர்த்தும் அறிகுறி.

மூன்று வெள்ளை படை வீரர்கள் ( three white soldiers )

இது மூவுலக்கை காளை ஒழுங்காகும். வரிசையா மூன்று  நாள்கள் வெள்ளை உடல் தோன்றும். எல்லா காளை ஒழுங்கைப்போலவே இது இறங்கு முக போக்கில் தோன்றும். இது அரிதாகவே தோன்றும் ஒழுங்கு. 

ஏன் வெள்ளை படை வீரன்  என்றால் விலை ஏற்றத்தை காட்டும் வெள்ளை நிறத்துக்காக வெள்ளைக்காரன உசத்தி பேசனும் என்பதற்காக அல்ல.

எப்படி இவ்வொழுங்கு அமையும்?

1. இறங்க முக போக்கு இருக்கனும் அதன்  கடைசி உலக்கையின் உடலின் நிறம் வெள்ளையாக இருக்கும் இதை முதல் உடல் என்போம்.. 
2. அடுத்த நாளின் உடலும் வெள்ளையாக இருக்க வேண்டும். இந்த உடலின் விலை தொடக்கமும்   முடிவும் முந்தைய நாள் உடலின் விலை தொடக்கம் & முடிவை விட அதிகமாக இருக்க வேண்டும். 
3. அதேபோல் மூன்றாம் நாளின் (மூன்றாவது வெள்ளை உடல்) உடலின் விலை தொடக்கமும்  முடிவும் முந்தைய நாள் உடலின் விலை தொடக்கம் & முடிவை விட அதிகமாக இருக்க வேண்டும். 
4. பொதுவாக  இரண்டாம் மூன்றாம் நாள்களின் உடல்கள் முந்தை உடலின் மையப்பகுதியில் இருந்து தொடங்கும்.

சமிக்கையை அதிகப்படுத்தும் செயல்கள்

•  முதல் நாள் உடலை விட பெரிதாக (நீளமாக) இரண்டாம் நாள் உடல் இருக்க வேண்டும்
• இரண்டாம் நாள் உடலும் மூன்றாம் நாள் உடலும் கிட்டத்தட்ட ஒரே நீளத்தில் இருக்க வேண்டும்.
• குச்சிகள் மிக சிறிதாகவோ இல்லாமலோ இருக்க வேண்டும்
• தெளிவான இறங்கு முக போக்கில் இந்த ஒழுங்கு தோன்ற வேண்டும்.
• உடல்களின் நீளம் அதிகமாக இருப்பது இதன் வீரியத்தை காட்டும்   அறிகுறி.
• வாங்கல் விற்றல் அதிகமாக நடந்திருக்க  வேண்டும்.

ஒழுங்கைப்பற்றிய சில குறிப்புகள்

**  மூன்றாம் நாள் உடலின் நீளம் மற்ற இரு நாள்களை விட சிறிதாக இருந்தால் தவிர்ப்பது நலம்.
** இறங்கு முகத்தில் வெள்ளை உடலுக்கு பதிலாக கருப்பு உடல் (மூன்று காகங்கள்) தோன்றினால் விலை மேலும் அதல பாதாளத்திற்கு போகும் என்பதற்கான அறிகுறியாகும்.
 **  நெடிய இறங்கு முக போக்கின் பின்  மூன்று  வெள்ளை படை வீரர்கள் தோன்றுவது சில மாதங்கள் பங்கை வைத்திருந்து விற்பவர்களுக்கு ஏற்றது.

ஏன் இந்த ஒழுங்கு  வேலைசெய்யுமென்று   நினைக்கிறார்கள்?

நெடிய இறங்கு முக போக்கின் போது கரடிகள் சோர்வடைந்து காளைகள் வீரியத்துடன் விலையை முன்னேற்றும். தொடர்ந்து மூன்று நாள்கள் விலை ஏறுவது சந்தையின் போக்கு மாற்றம் அடைகிறது  என்பதை உணர்த்தும் அறிகுறி. 

டோஜி

டோஜி
தொடக்க விலையும் முடிவு விலையும் ஒன்றாக இருந்தால் அது டோஜி எனப்படும். போக்கு மாற்றத்தை குறிக்கும் குறிப்பிடத்தக்க ஒழுங்காகும்.

தொடக்க விலையும் முடிவு விலையும் ஒன்றாக இல்லாமல் மிக நெருக்கமாக இருந்தாலும் அது டோஜி எனப்படும் அதை நெருங்கிய டோஜி என்பர். எது நெருங்கிய டோஜி என்பது அவரவர் பார்க்கும் பார்வையை பொருத்தது இதை வரையறுக்க கடுமையான விதிகள் இல்லை. ஆனால் சமீபத்திய சந்தையின் செயல்பாட்டை வைத்து இதை அறிய முற்படுவது ஒரு வழிமுறை. தொடர்ச்சியாக நிறைய சிறிய உடல்கள் இருந்தால் நெருங்கிய டோஜி குறிப்பிடத்தக்கதாக பார்க்கப் படாது. சந்தையானது முக்கியமான திருப்புமுனை புள்ளியில் இருந்தாலோ காளை அல்லது கரடியின் ஓட்டம் முற்றிய கட்டத்தில் இருந்தாலோ மற்ற நுட்ப காட்டிகள் எச்சரிக்கை சமிக்கை கொடுத்தாலோ நெருங்கிய டோஜியை டோஜி எனக்கொள்ளலாம்.
டோஜி போக்கு மாற்றம் நடைபெறப்போவதை குறிக்கும் சமிக்கையாகும். டோஜி குறிக்கும் போக்கு மாற்றம் நடைபெறாமல் போனாலும் தவறான சமிக்கை படி நடப்பது உண்மையான சமிக்கை படி நடக்காமல் இருப்பதை விட மேலானதாகும்.

போக்கு மாற்றம் நடைபெறுவதும் அதன் வலிமையும் அடுத்த நாள் உடலின் நிறத்தையும் நீளத்தையும் பொருத்தே உறுதிபடுத்தப்படும். சந்தையில் நிறைய டோஜிக்கள் உருவாகாவிட்டால் மட்டுமே புதிதாக உருவாகும் டோஜி சிறப்பானதாக கருதப்படும். ஒரு நாளின் 30 நிமிட வரைபடத்தை பார்த்தால் அதில் நிறைய டோஜிக்களும் நெருங்கிய டோஜிக்களும் தென்படும் அதனாலேயே மெழுகுவர்த்தி அலசல் ஒரு நாளின் 30 நிமிட வரைபடத்தை பார்த்து வர்த்தகம் புரிபவர்களுக்கு ஏற்றதல்ல.

*தெளிவான  இறங்கு முக போக்கிலோ ஏறு முக போக்கிலோ டோஜி  ஏற்பட்டால் போக்கு மாற்றம் நடைபெற வாய்ப்பு.
*டோஜிக்கு முன் நீளமான உடல் தோன்றினால் அந்த நிற உடல் முடிவுக்கு வருது என்று பொருள்.
*ஏறு முக போக்கில் டோஜிக்கு பின் நீளமான கருப்பு உடல் தோன்றினால் ஏறுமுக போக்கு முடிவுக்கு வந்ததை அறியலாம். இதே போல் இறங்கு முக போக்கில் டோஜிக்கு பின் நீளமான வெள்ளை உடல் தோன்றினால் இறங்கு முக போக்கு முடிவுக்கு வந்ததை அறியலாம்.

உச்சியில் டோஜி

டோஜி ஏறுமுகத்தின் உச்சியில் இருந்தால் போக்கு மாற்றம் ஏற்படப்போவதை அறிவிக்கும்  எச்சரிக்கை மணியாக விளங்கும். பொதுவாக ஏறுமுக போக்கில் நீளமான வெள்ளை  உடல் உலக்கைக்கு பின் டோஜி தோன்றினால் போக்கு மாற்றத்திற்கான வாய்ப்பு அதிகம். டோஜி முதலீட்டாளர்களின் குழப்பமான மனநிலையை காட்டுவதால் அது ஏறுமுக போக்கில் மாற்றத்தை உருவாக்கும் என நம்பப்படுகிறது.  காளைகளின்  மனக்குழப்பம் ஏறுமுக போக்கை கட்டுக்குள் வைத்திருக்க உதவாது,  திட நம்பிக்கை அதற்கு வேண்டும். ஏறுமுக போக்கு தொடர்ந்தாலோ அதிக வாங்கல் நிகழ்ந்தாலோ டோஜி காளைகள் பக்கம் சாய்ந்து விட்டத்தை அறியலாம்.

இதே போல் டோஜி இறங்கு முகத்திலும் போக்கு மாற்றத்தை ஏற்படுத்தும்  வலிமை  உடையது.  டோஜிக்களில் காளைகளுடைய வலுவும் கரடிகளின் வலுவும் சமநிலையில் இருக்கும் இதுவும் காரணமாக இருக்கலாம். ஆனால் உச்சியில் ஏற்படும் ஏறுமுக போக்கு மாற்றத்தை விட இறக்கு முக போக்கு மாற்றத்தை உறுதிபடுத்த அதிக சமிக்கைகள் வேண்டும். சமிக்கைகள் என்றால் பல காட்டிகள் என்று பொருள்.

புகழ்பெற்ற மெழுவர்த்தி ஒழுங்குகள்

இதுவரை எழுதிய மெழுவர்த்தி ஒழுங்குகளே புகழ்பெற்றவை. மேலும் சில மெழுவர்த்தி ஒழுங்குகள் இருக்கு அதை இனி எழுதுகிறேன்.

எழுத்தில் குறையிருந்தாலோ,  கலைச்சொல்லில் மாற்று கருத்து இருந்தாலோ  தெரிவிக்கவும்.  ஓர்மையாக, எங்கும் கலைச்சொல்லை ஒரே மாதிரி பயன்படுத்துவது சிறப்பு, மக்களிடம் பரவ எளிதாகும்.

காளை ஒழுங்குகள்
1. சுத்தியல் (Hammer) 
2. தலைகீழ் சுத்தியல் (inverted hammer)
3. காளை விழுங்கி (Bullish Engulfing)
4. காளை புள்ளத்தாச்சி(Bullish Harami)
5. துளை (Piercing)
6. காலையில் விண்மீன் (Morning star)

கரடி ஒழுங்குகள்
1. தொங்கும் மனிதன் (Hanging man)
2. விழும் விண்மீன் (Shooting star)
3. கரடி விழுங்கி (Bearish Engulfing)
4. கரடி புள்ளத்தாச்சி (Bearish Harami)
5. கார்முகில் (Black cloud)
6. மாலையில் விண்மீன் (evening star)

இது தவிர டோஜி என்று ஒன்று உள்ளது அடுத்து அதை எழுதுகிறேன்.  மெழுவர்த்தி ஒழுங்கு  என்றாலே சிலருக்கு டோஜி தான் நினைவுக்கு வரும்.

மாலையில் விண்மீன் (Evening star)

மாலையில் விண்மீன்

ஏறு முக போக்கிலேயே தோன்றும் மூன்று உலக்கை ஒழுங்கான இது இறங்கு முக போக்கின் தொடக்கம் ஆகும். கரடி ஒழுங்கான இது மூன்று உலக்கைகளை வைத்து கட்டமைக்கப்படும் ஒழுங்காகும்.

1. மாலையில்  விண்மீனில் முதல் உடல் நீண்ட வெள்ளையாகும். 
2. இரண்டாவது உடல் முதல் உடலிருந்து  நன்கு இடைவெளி விட்டு மேல் தோன்றும். இது சிறியதாகவும் முதல் நாள் உடலை தொடாமல் விண்மீன் போல் இருக்கும். இச்சிறிய உடல் முதலீட்டாளர்கள் வாங்குவதா விற்பதா என்ற குழப்பமான மனநிலையில் உள்ளதை உணர்த்துகிறது.
3.  மூன்றாவது நாள் உடல் கருப்பு நிறத்துடன் முதல் நாள் உடலின் பாதியை தொடும் அளவு இருந்தால் போக்கு மாற்றம் ஏற்படும் வாய்ப்பு மிக அதிகம், பாதிக்கும் மேல் எந்தளவு நீளமானதாக உள்ளதோ அது ஏற்படப்போகும் போக்கு மாற்றத்தின் வலிமையை குறிக்கும்.

முதல் நாள் உடலும் மூன்றாம் நாள் உடலும் நீளமானதாக இருந்தாலோ விண்மீனின் (இரண்டாம் நாள்) உடல் சிறிதாக குழப்பமான மனநிலையை எதிரொளித்தாலோ இரண்டாம் நாள் உடல் முதல் & மூன்றாம் நாளை தொடாமல் இடைவெளியுடன் இருந்தாலோ போக்கு மாற்றம் ஏற்படும் வாய்ப்பு மிக அதிகம்.

இரண்டாம் நாள் காணப்படும் சிறிய உடலுக்கு நிறம் பொருட்டில்லை என்றாலும்  அது கருப்பாக இருப்பது சிறப்பு.

சமிக்கையை அதிகப்படுத்தும் செயல்கள்

• தெளிவான ஏறுமுகம் இருக்கவேண்டும்.
• முதல் நாள் உடலுக்கும் இரண்டாம் நாள் உடலுக்கும் நன்கு இடைவெளி இருக்க வேண்டும். இரண்டாம் நாள் உடலுக்கும்  மூன்றாம் நாள் உடலுக்கும் இடைவெளி இருக்க வேண்டும். அது அதிகமாக இருந்தால் மிகவும் வரவேற்க தக்கது.
•  முதல் & மூன்றாம் நாள் உடல்களின் நீளம்  அதிகமாக இருப்பது சிறப்பு.
• மூன்றாம் நாள்  உடலின் நீளம் முதல் நாள் உடலின் உச்சிக்கு அருகில் இருப்பது சிறப்பு.

ஏன் இந்த ஒழுங்கு  வேலைசெய்யுமென்று   நினைக்கிறார்கள்?

ஏறுமுக போக்கு வலிமையாக இருப்பதால் வாங்குபவர்கள் அதிகம் மொய்ப்பார்கள். எனினும் விற்பவர்கள் விலை சரியாக உள்ளதென்று இச் சமயத்தில் பங்கை விற்று லாபம் பார்க்க ஆரம்பிப்பார்கள். இதனால் அடுத்த நாள் காளைக்கும் கரடிக்கும் போராட்டம் நடக்கும் வணிகத்தின் வீச்சும் குறைவாக இருக்கும். காளைகள் கவலை கொள்ளும் கரடிகளின் செல்வாக்கு மிகும்.மூன்றாம் நாள் அதிக விற்பனை நடக்கும். வாங்கல் விற்றலும் அதிகமாக இருக்கும். போக்கு மாறி விட்டதின் அறிகுறி என்று கொள்ளலாம்.

வணிக வீச்சு - trading range

காலையில் விண்மீன் (Morning star)

காலையில் விண்மீன்

இறங்கு முக போக்கிலேயே தோன்றும் மூவுலக்கை ஒழுங்கான இது ஏறு முக போக்கின் (காளை) தொடக்கம் ஆகும். இது மூன்று உலக்கைகளை வைத்து கட்டமைக்கப்படும் ஒழுங்காகும்.

1. காலையில் விண்மீனில் முதல் உடல் நீண்ட கருப்பாகும். 
2. இரண்டாவது உடல் முதல் உடலிருந்து  நன்கு இடைவெளி விட்டு கீழாக தோன்றும். இது சிறியதாகவும் முதல் நாள் உடலை தொடாமல் விண்மீன் போல் இருக்கும். இச்சிறிய உடல் முதலீட்டாளர்கள் வாங்குவதா விற்பதா என்ற குழப்பமான மனநிலையில் உள்ளதை உணர்த்துகிறது. 
3. மூன்றாவது நாள் உடல் வெள்ளை நிறத்துடன் முதல் நாளின் முடிவை விட சற்று அதிகமாக முடிந்திருக்கும். 

மூன்றாவது நாள் உடல் முதல் நாள் உடலின் பாதியை தொடும் அளவு இருந்தால் போக்கு மாற்றம் ஏற்படும் வாய்ப்பு மிக அதிகம், பாதிக்கும் மேல் எந்தளவு நீளமானதாக உள்ளதோ அது ஏற்படப்போகும் போக்கு மாற்றத்தின் வலிமையை குறிக்கும்.

முதல் நாள் உடலும் மூன்றாம் நாள் உடலும் நீளமானதாக இருந்தாலோ விண்மீனின் (இரண்டாம் நாள்) உடல் சிறிதாக குழப்பமான மனநிலையை எதிரொளித்தாலோ இரண்டாம் நாள் உடல் முதல் & மூன்றாம் நாளை தொடாமல் இடைவெளியுடன் இருந்தாலோ போக்கு மாற்றம் ஏற்படும் வாய்ப்பு மிக அதிகம்.

இரண்டாவது நாள் தோன்றும் உடலின் நிறம் எதுவாக வேண்டுமென்றாலும் இருக்கலாம் ஆனால் வெள்ளையாக இருப்பது சிறப்பு.

சமிக்கையை அதிகப்படுத்தும் செயல்கள்.

• தெளிவான இறங்கு முகத்தில் காலையில் விண்மீன் தோன்ற வேண்டும்.
• முதல் நாள் கருப்பு உடலும் மூன்றாம் நாளின் வெள்ளை உடலும் நீளமாக இருப்பது சாலச்சிறந்தது.
• முதல் நாளுக்கும்  இரண்டாம் நாளுக்குமான இடைவெளி  அதிகமாக இருப்பது சிறப்பு.
• முதல் நாள் கருப்பு உடலின்  நீளத்திற்கு   அருகிலோ அல்லது அதை விட நீளமாக மூன்றாம் நாளின் வெள்ளை உடலின் நீளம் இருந்தால் போக்கு  மாற்றம் ஏற்பட அதிக வாய்ப்புண்டு.
• முதல்  நாளும் மூன்றாம்  நாளும் அதிக வாங்கல் விற்றல் நடுந்திருக்க வேண்டும்.

போக்கு மாற்றம் நடைபெறும்  என நினைக்க  காரணம்.

தெளிவான இறங்கு  முக போக்கில் பெரும் விற்றல் நடந்த நாளின் இறுதி கட்டத்தில் காளைகள் உள்நுழையும். முதல் நாளின் முடிவை விட அதிக இடைவெளிவிட்டு கீழ் தொடங்கும் இரண்டாம் நாளின் சிறிய உடல் முதலீட்டாளர்களின் குழப்பமான மனநிலையை காட்டும். மூன்றாம் நாள் கரடிகள் நம்பிக்கையிழந்து காளைகள் செல்வாக்கு பெற்று இரண்டாம் நாளின் தொடக்கம்\முடிவை விட அதிக மேல் இடைவெளியில் தொடங்கி ஓடும்.

கரடி புள்ளத்தாச்சி Bearish Harami

கரடி புள்ளத்தாச்சி
இரட்டை உலக்கை ஒழுங்கான இது ஏறுமுக போக்கிலேயே ஏற்படும்.

• முதல் நாள் பெரிய வெள்ளை உடலும் அடுத்த நாள் சிறிய கருப்பு உடலும் தோன்றும். 
• இந்த சிறிய கருப்பு உடல் வெள்ளை உடலுக்குள்  முற்றிலும் அடங்குவதாக இருக்கும். 
• முதல் நாளுக்கு முந்தைய நாளும் வெள்ளை உடல் தோன்றி ஏறு முக போக்கை காட்டும். இந்த ஒழுங்கு உடனடியாக ஏறு முக போக்கு முடிவுக்கு வருவதை குறிக்கும்.

முதல் நாள் இருக்கும் வெள்ளை உடல் ஏறு முக போக்கு தொடர்வதை காட்டுகிறது. அடுத்த நாள் உடல் முதல் நாள் உடலில் இருந்து வெளிவருவது போல் இருக்கும். பொதுவாக இதன் நிறம் கருப்பாக இருக்கும் ஆனால் எப்போதும் அப்படி இருக்க வேண்டும் என்ற அவசியம் இல்லை. மெழுகுவர்த்தியின் அளவு & அதன் இடத்தை பொருத்து போக்கு மாற்றத்தின் வீரியம் இருக்கும்.  பெரிய வெள்ளை உடலும் அதற்கு அடுத்த நாள் கருப்பு உடலும் தோன்றுவது ஏறு முக போக்கு முடிவுக்கு வருவதன் அறிகுறியாகும். மேற்கத்திய “உள் நாள்” என்பது உடலும் அதன் குச்சிகளும் முந்தைய நாளின் உடலுக்குள் அடங்குவதாகும் ஆனால் இதில் உடல் மட்டுமே முந்தைய நாளின் உடலுக்குள் அடங்கும்.

சமிக்கையை அதிகப்படுத்தும் செயல்கள்.

• கருப்பு மற்றும் வெள்ளை உடல்கள் பெரிதாக இருந்தால் போக்கு மாற்றம் ஏற்படும் வாய்ப்பு மிக அதிகம்.
• கருப்பு உடல் அளவு, வெள்ளை உடல் அளவுக்கு மிக அருகில் இருந்தால் அதாவது முந்தைய நாள் தொடக்கத்துக்கு அருகில் அடுத்த நாளின் முடிவு இருந்தால் கருப்பு உடலின் அளவு எவ்வளவாக இருந்தாலும் போக்கு மாற்றம் ஏற்படும் வாய்ப்பு மிக அதிகம்.

போக்கு மாற்றம் நடைபெறுமென்று நினைக்கவைக்கும் காரணி

ஏறுமுக போக்கிற்கு பின் தோன்றும் பெரிய வெள்ளை உடலுக்கு பின் கரடி (கருப்பு உடல்) தோன்றி முந்தைய நாள் முடிவை விட குறைவான விலையில் அன்றைய நாளின் தொடக்கத்தை ஆரம்பிக்கும். இதனால் நெடுக்கர்கள் கவலை கொண்டு பங்குகளை விற்று லாபத்தை எடுக்க முயல்வார்கள். இதனால் அன்றைய நாளின் பங்கின் முடிவு விலை தொடக்கத்தை விட குறைந்து காணப்படும். முடிவு விலை குறைந்து காணப்படுவதால் காளைகள் கவலை கொள்ளும். போக்கு பாதிப்படைந்துள்ளது நன்கு தெரிகிறது. சிறிய கருப்பு உடல் போக்கு மாறுகிறது என்பதை அனைவருக்கும் உணர்த்துகிறது. குறுக்கர்களின் விற்பனையாலும்  நெடுக்கர்கள் லாபத்தை எடுக்க பங்கை விற்பதாலும் வர்த்தக அளவு அதிகரித்து காணப்படும்.

காளை புள்ளத்தாச்சி (Bullish Harami)

காளை புள்ளத்தாச்சி
இரட்டைத்தடி ஒழுங்கான இது போக்கு மாற்றத்தை குறிப்பிடும் ஒழுங்காகும். முதல் நாள் பெரிய கருப்பு உடலும் அடுத்த நாள் சிறிய வெள்ளை  உடலும் தோன்றும். இந்த சிறிய வெள்ளை  உடல் கருப்பு உடலுக்குள்  முற்றிலும் அடங்குவதாக இருக்கும். இந்த ஒழுங்கு உடனடியாக இறங்கு முக போக்கு முடிவுக்கு வருவதை குறிக்கும்.

முதல் நாள் இருக்கும் கருப்பு உடல் இறங்கு முக போக்கு தொடர்வதை காட்டுகிறது. அடுத்த நாள் உடல் முதல் நாள் உடலில் இருந்து வெளிவருவது போல் இருக்கும். பொதுவாக இதன் நிறம் வெள்ளையாக இருக்கும் ஆனால் எப்போதும் அப்படி இருக்க வேண்டும் என்ற அவசியம் இல்லை. மெழுகுவர்த்தியின் அளவு & அதன் இடத்தை பொருத்து போக்கு மாற்றத்தின் வீரியம் இருக்கும்.  பெரிய கருப்பு உடலும் அதற்கு அடுத்த நாள் வெள்ளை உடலும் தோன்றுவது இறங்கு முக போக்கு முடிவுக்கு வருவதன் அறிகுறியாகும். மேற்கத்திய “உள் நாள்” என்பது உடலும் அதன் குச்சிகளும் முந்தைய நாளின் உடலுக்குள் அடங்குவதாகும் ஆனால் இதில் உடல் மட்டுமே முந்தைய நாளின் உடலுக்குள் அடங்கும்.

சமிக்கையை அதிகப்படுத்தும் செயல்கள்.
* கருப்பு மற்றும் வெள்ளை உடல்கள் பெரிதாக இருந்தால் போக்கு மாற்றம் ஏற்படும் வாய்ப்பு மிக அதிகம்.
* வெள்ளை உடல் அளவு கருப்பு உடல் அளவுக்கு மிக அருகில் இருந்தால் அதாவது முந்தைய நாள் தொடக்கத்துக்கு அருகில் அடுத்த நாளின் முடிவு இருந்தால் வெள்ளை உடலின் அளவு எவ்வளவாக இருந்தாலும் போக்கு மாற்றம் ஏற்படும் வாய்ப்பு மிக அதிகம்.

ஏன் போக்கு மாற்றம் நடைபெறுமென்று நினைக்கறாங்க?

விற்பவர்கள் அதிகம் சந்தையில் உள்ளதால் இறங்கு முக போக்கு தொடர்கிறது இதன் பின் காளை உள்நுழைந்து அடுத்த நாள் தொடக்க விலையை முந்தைய நாளின் முடிவை விட அதிகமாக வைக்கும். இதனால் குறுக்கர்கள் கவலையடைந்து நட்டத்தை குறைப்பதற்காக பங்குகளை வாங்கத்தொடங்குவர். இதனால் பங்கின் விலை அதிகரித்து அன்றைய நாளில் அதிகமாக முடியும் (வெள்ளை உடல்). இது குறு விற்பனையாளர்களுக்கு போக்கு மாறுகிறது என்பதை உணர்த்தும். குறுக்கர்கள் (short sellers) நிறைய விற்பதால் வழக்கத்தை விட பங்கின் வாங்கல் விற்றல் அதிகமாக இருக்கும். இரண்டாம்  நாள் டோஜி தோன்றினால் அது “புள்ளத்தாச்சி குறியீடு” எனப்படும். அது போக்கு மாற்றம் ஏற்படுமா என்ற ஐயத்தை ஏற்படுத்தும்.

காளை புள்ளத்தாச்சிக்கும் காளை விழுங்கிக்கும் உள்ள வேறுபாட்டை அறிக. இவை இரண்டும் இது அதுவா, அது இதுவா என குழப்பிடும்.

கார்முகில் (Black cloud)

கார்முகில்

இரட்டை உலக்கை ஒழுங்கான கார்முகில் காளை  ஒழுங்கான துளைக்கு மாற்றான கரடி ஒழுங்காகும். இது தெளிவான ஏறு முக போக்கிலேயே ஏற்படும். முதல் நாள் வெள்ளை உடலும் அடுத்த நாள் கருப்பு உடலும் ஏற்படும். முதல் நாள் முடிவை விட நன்கு இடைவெளி விட்டு மேலாக அதாவது அதிக விலையில் தொடக்கம் இருக்கும். முந்தைய நாள் வெள்ளை உடலுக்கு பாதிக்கு (50%) மேல் வந்து விலை முடியும். அதாவது முந்தைய நாளின் தொடக்கத்துக்கு அருகில் என கொள்ளலாம் ஆனால் முந்தைய நாளின் தொடக்கத்தை அடுத்த நாளின் முடிவு தொடாது.

கார்முகில் ஒழுங்கு தோன்றியதுக்கு அடுத்த நாள் கருப்பு\சிவப்பு உலக்கை தோன்றினாலே கார்முகில் ஒழுங்கு உறுதிபடுத்தப்படும் இல்லையென்றால் அது போங்கு காட்டுதுன்னு பொருள்.

மேலும் கார்முகிலின் உடம்பு  வெள்ளை\பச்சை, கருப்பு\சிவப்பாக இருக்கும், குச்சி மிகச்சிறியதாக அல்லது இல்லாமல் கூட இருக்கும். இப்படி குச்சி இல்லாமல் இரு உடம்புகளும் இருந்தால் விலை  குறைவு உறுதியானது என அறியலாம்.

சமிக்கையை அதிகப்படுத்தும் செயல்கள்.

* முந்தைய நாள் (வெள்ளை உடல்) விட அதிக இடைவெளி விட்டு அடுத்த நாள் (கருப்பு உடல்) விலை தொடக்கம் இருந்தால் போக்கு மாறுவதற்கான வாய்ப்பு அதிகம்.
* வெள்ளை& கருப்பு  உடலின்  நீளம் மிக அதிகமாக இருந்தால் போக்கு மாறுவதற்கான வாய்ப்பு மிக அதிகம்.
*வெள்ளை உடலின் முழு உயரத்துக்கு அருகில் கருப்பு உடலின் உடல் இருந்தால்  போக்கு மாறுவதற்கான வாய்ப்பு மிக அதிகம். (வெள்ளை உடலை கருப்பு உடல் தாண்டக்கூடாது)
* கடைசி இரு நாள்களிலும் அதிக வாங்கல் விற்றல் நடந்திருந்தால் போக்கு மாறுவதற்கான வாய்ப்பு அதிகம்.

போக்கு   மாற்றம் நடைபெறும் என்று  நினைக்க வைக்கும் செயல் என்ன?

ஏறுமுக போக்கு என்றால் அது காளை கட்டுப்பாட்டில் உள்ளது என்பது அறிந்ததே. அடுத்த நாள் தொடங்கியதும் காளைகள் மேலும் முன்னேறும் அதனால் விலை கூடும் ஆனால் கரடிகள் உள்நழைந்ததும் விலை  சரிந்து அந்நாளின் விலை முடிவை ஏறுமுக போக்கில் பங்கு இருந்தாலும் குறைத்துவிடும். கரடி செல்வாக்கு  தொடர்ந்தால் அடுத்த  நாளும் விலை முடிவு குறைந்து காணப்படும் (கருப்பு\சிவப்பு உலக்கை). இது ஏறுமுக போக்கை முடித்து வைக்கும் போக்கு மாற்றம் ஏற்பட அதிக வாய்ப்பு என அறியலாம்.

துளை (piercing)

துளை

இரட்டை உலக்கை ஒழுங்கான இது  காளை ஒழுங்காகும். இது தெளிவான இறங்கு முக போக்கிலேயே ஏற்படும். முதல் நாள் கருப்பு\சிவப்பு உடலும் அடுத்த நாள் வெள்ளை\பச்சை உடலும் ஏற்படும். ஆறு முதல் பதினைந்து நாட்கள் தொடர்ந்து கருப்பு\சிவப்பு உடல் தென்பட்டு பின் துளை ஒழுங்கு ஏற்பட்டால் சிறியளவிலான இறங்கு முக போக்கு முடிவுக்கு வருவதாக கொள்ளலாம். துளை ஒழுங்கு அதாவது வெள்ளை உடல் தோன்றுவதற்கு முந்தைய உடல் பெரிய கருப்பாக இருக்கும். கருப்பு உடலுக்கு இடைவெளி விட்டு கீழே அடுத்த நாள் விலை தொடங்கும். ஆனால் முந்தைய நாள் கருப்பு உடலுக்கு பாதிக்கு (50%) மேல் வந்து விலை முடியும் அதாவது முந்தைய நாளின் தொடக்கத்துக்கு அருகில் என கொள்ளலாம் ஆனால் முந்தைய நாளின் தொடக்கத்தை அடுத்த நாளின் முடிவு தொடாது.

இக்கட்டுரையில் கருப்பும் சிவப்பும் மாறி மாறி பயன்படுத்தப்படும் அதே போல் வெள்ளையும் பச்சையும் மாறி மாறி பயன்படுத்தப்படும்

சமிக்கையை அதிகப்படுத்தும் செயல்கள்.

* முந்தைய நாள் (கருப்பு உடல்) விட அதிக இடைவெளி விட்டு அடுத்த நாள் (வெள்ளை உடல்) விலை தொடக்கம் இருந்தால் போக்கு மாறுவதற்கான வாய்ப்பு அதிகம்.
* கருப்பு & வெள்ளை உடலின்  நீளம் மிக அதிகமாக இருந்தால் போக்கு மாறுவதற்கான வாய்ப்பு மிக அதிகம்.
*கருப்பு உடலின் முழு உயரத்துக்கு அருகில்  வெள்ளை உடலின் உடல் இருந்தால்  போக்கு மாறுவதற்கான வாய்ப்பு மிக அதிகம்.
* கடைசி இரு நாள்களிலும் அதிக வாங்கல் விற்றல் நடந்திருந்தால் போக்கு மாறுவதற்கான வாய்ப்பு அதிகம்.

ஏன் போக்கு மாற்றம் நடைபெறுமென்று நினைக்கறாங்க?

முதல் நாள் விற்பவர்கள் அதிகரித்து கரடியின் செல்வாக்கு மிகுந்து காணப்படும். இதன் தொடர்ச்சி அடுத்த நாளும் தொடரும் விலை மேலும் கீழே போகும். ஆனால் நாளின் பிற்பகுதியில் வாங்குபவர்கள் அதிகரித்து காளையின் செல்வாக்கு மிகும். காளை முந்தைய நாள் கரடியின் செல்வாக்கை குறைத்து விலையை அதிகப்படுத்தும். இப்போது விற்பவர்கள் அதாவது கரடி கவலை கொள்ளும். அடுத்த நாள் வாங்குபவர்கள் அதிகரித்தால் போக்கு  மாற்றம் உறுதிபடுத்தப்படும்.

கரடி விழுங்கி (Bearish Engulfing)

கரடி விழுங்கி

இரட்டை உலக்கை ஒழுங்கான கரடி விழுங்கி ஒழுங்கில் வாங்குபவர்களை விட விற்பவர்கள் மிக அதிகரித்து காணப்படுவர். இந்த ஒழுங்கில் முதல் நாள் சிறிய வெள்ளை\பச்சை நிற உடலும் அடுத்த நாள் கருப்பு\சிவப்பு நிற உடல் அதை மறைப்பது (விழுங்குவது) போல் இருக்கும். இது ஏறுமுக போக்கிலேயே ஏற்படும். முதல் நாளின் தொடக்கத்தை விட அடுத்த நாளின் தொடக்கம் மிக அதிகமாக இருக்கும் ஆனால் முதல் நாளின் முடிவை விட அடுத்த நாளின் முடிவு மிக கீழாக இருக்கும்.




சமிக்கையை அதிகப்படுத்தும் சில காரணிகள்

• நிறைய இடத்தில் கரடி விழுங்கி தோன்றினாலும் தெளிவான ஏறு முகத்தில் தோன்றினால் போக்கு மாற்ற வாய்ப்பு அதிகம்.
• இரு சிறு உடல்கள் கூட கரடி விழுங்கியை உருவாக்கும் ஆனால் உடல்களின் நீளம் அதிகமிருப்பது சிறப்பு
• இரண்டாவது தோன்றும்  கருப்பு\சிகப்பு நிற உடலின் நீளம் முன்னதை விட மிகப்பெரிதாக இருப்பது சிறப்பு.
• கரடி விழுங்கியின் கருப்பு\சிவப்பு நிற உடல் நாளில் அதிகளவு வாங்கல் விற்றல் நடந்திருந்தால் போக்கு மாற்ற வாய்ப்பு அதிகம்.
• பங்கு சந்தை நிலையான போக்கில் இல்லாமல் மேலும் கீழும் போவதுமாக இருந்தால் கரடி விழுங்கியை அவ்வளவாக நம்பமுடியாது.

கீழுள்ள மாதிரி மூன்று உலக்கையை வைத்தும் சிலர் கரடி விழுங்கியை சொல்கின்றனர்.  இதில் எனக்கு உடன்பாடில்லை. கரடி விழுங்கி என்பது ஈர் உலக்கை தான் மூவுலக்கை அல்ல,

ஏன்னா சிறிய பச்சை உலக்கையை அடுத்து வரும் இரு சிவப்பு உலக்கைகளும் சேர்ந்து விழுங்கி விட்டதாம்.

இறங்கு முகத்தில் தோன்றும் கரடி விழுங்கி சிறப்பானது விலை மேலும் கீழே போகும் என்பதை உணர்த்துவது.

வெறும் ஒழுங்கை மட்டும் வைத்து பங்கின் போக்கை கணிக்காமல் ஆதரவு- தடை,  ஃபிபனாச்சி மற்றும் சில காட்டிகள் உடன் பயன்படுத்தனும். இவற்றை விளக்கமா ஒழுக்குகளுக்கு  அப்புறம் சொல்கிறேன்.

எது தெரியுமா மிக சக்தி வாய்ந்த கரடி விழுங்கி ?  இறங்கு முகத்தில் விலை திருத்தம் ஏற்பட்டு விலை சிறிது ஏறுகிறது.  தடை கோட்டை தாண்டாமல் அங்கு கரடி விழுங்கி ஏற்படுவது ஆகும். அது ஆதரவு கோட்டை உடைத்து கீழே செல்லும். 10%  மட்டும் விலை ஏறினால்\குறைந்தால் அதை திருத்தம் எனலாம்.

மேலுள்ள படத்தை பார்த்தால் இறங்கு முகம் சிறிய திருத்தை சந்நித்து பின் கரடி விழுங்கி ஏற்பட்டு மீண்டும் இறங்கு முகத்தை தொடருவதை காணலாம்.

காளை விழுங்கி (Bullish Engulfing )

விழுங்கி
போக்கு மாறுவதை காட்டும் விழுங்கி ஒழுங்கு இரு மாறுபட்ட நிற உடல்களை கொண்டிருக்கும். இது இரு உலக்கைகளால் ஆன  ஒழுங்காகும். முந்தின நாள் நிற உடலை (மேல் & கீழ் குச்சியையும் சேர்த்து) அடுத்த நாள் உடல் முழுவதுமாக மறைத்து இருக்கும்.


காளை விழுங்கி

காளை ஓட்டம் இறங்கு முக போக்கிலேயே தொடங்கும். இரட்டை உலக்கை ஒழுங்கான காளை விழுங்கியில்

1. முதல் நாள் கருப்பு\சிவப்பு  நிற மெழுகுவர்த்தி இருக்கும் 
2. அடுத்த நாள் பெரிய வெள்ளை\பச்சை நிற மெழுகுவர்த்தியை கொண்டிருக்கும் அது கருப்பு\சிவப்பு நிற மெழுகுவர்த்தியை விட பெரிதாகவும் அதை முழுவதும் மறைப்பது(விழுங்குவது) போல் இருக்கும். இது விற்பவர்களை விட வாங்குபவர்கள் அதிகரித்ததை காட்டுகிறது. 
3. அடுத்த நாள் தோன்றும் பெரிய உடல் முதல் நாள் முடிவை விட தொடக்கம் குறைவாகவும் முதல் நாள் தொடக்கத்தை விட முடிவு அதிகமாகவும் இருக்கும்.

  விதிகள் –

• முதல் நாள் உடலை விட அடுத்த நாள் உடலின் நீளம் பெரிதாக, முழுவதும் விழுங்குவது போல் இருக்கும்.
• சில நாழிகையாவது விலை முதல் நாள் முடிவை விட குறைந்து இருக்கும்.
• முதல் நாள் உடலின் நிறமும் அதற்கு முந்தைய நாள் உடலின் நிறமும் ஒன்றாக இருக்கும். இரண்டாம் நாள் உடலின் நிறம் அதற்கு முந்தைய இரு நாட்களின் நிறத்துக்கு மாற்றாக இருக்கும். (டோஜி மட்டுமே இதற்கு விதிவிலக்கு).

சமிக்கையை அதிகப்படுத்தும் செயல்கள்.

• முதல் நாள் சின்ன உடல் இருந்தால் அடுத்த நாள் மிகப்பெரிய உடல் இருக்கும். (இரு உடல்களின் நிறமும் வேறு வேறாய் இருக்கும்)
• பெரிய உடல் தோன்றும் நாளில் வாங்கல் விற்றல் அதிகம் நடந்திருக்கும்.
• பெரிய உடலானது சின்ன உடலையும் அதன் மேல் கீழ் குச்சிகளையும் விழுங்கி இருக்கும்.
• முதல் நாளுக்கும் அடுத்த நாளுக்குமான இடைவெளி அதிகரித்து காணப்பட்டால் இறங்கு முகம் மாறி ஏறுமுகமாக மாற்றம் நடக்க வாய்ப்பு அதிகம்.

ஏன் போக்கு மாற்றம் நடைபெறுமென்று நினைக்கறாங்க?

விலை கீழே விழுவது நடந்தவுடன் விலை முந்தின நாள் முடிவைவிட குறைவாக தொடங்கும், பின் வாங்குபவர்களின் எண்ணிக்கை அதிகரித்து முந்தின நாள் தொடக்கத்தை விட விலை முடிவு அதிகரித்து காணப்படும். இவ்விடத்தில்  முதலீட்டாளர்களின் உணர்ச்சிபூர்வ உளவியல் பங்கின் போக்கை மாற்றிவிடுகிறது..


காளை விழுங்கி ஒழுங்கை சரியான பயிற்சியுடன் சரியான இடத்தில் பயன்படுத்தினால் இலாபத்தை பெறும் வாய்ப்பு அதிகம். இந்த ஒழுங்கு லாபகரமாக தங்கள் வணிகத்தை சரிசெய்து கொள்ளும் வாய்ப்பை முதலீட்டாளர்களுக்கு வழங்குகிறது. முதலீட்டாளர்கள் சந்தையை படிக்கும் போது கடந்த காலங்களில் இந்த ஒழுங்கு குறிப்பிட்ட செய்திகளுக்கு எப்படி வினையாற்றியது என்று அறிவது அதிக லாபத்தை பெற வாய்ப்பளிக்கும்.

விழும் விண்மீன் ( Shooting star)

விழும் விண்மீன்

ஒற்றை உலக்கை ஒழுங்கான இது தொங்கும் மனிதனை போன்ற கரடி ஒழுங்காகும். ஏறு முக போக்கின் உச்சியில் ஏற்படும் இதன் உடல் சிறிதாக இருக்கும். இதற்கு கீழ் குச்சி இருக்காது இருந்தாலும் மிகச்சிறியதாக இருக்கும். உடலை விட குறைந்தது இரு மடங்கு கீழ் குச்சியின்  நீளம் இருக்கும். பார்க்க விண்மீன் கீழே விழுவது போல் இருக்கும். முதல் நாள் உடலை விட விழும் விண்மீனின் உடல் உயரத்தில் இருக்கும் அதாவது இரண்டுக்கும் இடைவெளி இருக்கும். விழும் விண்மீனின் நாளுக்கு அடுத்த நாள் உடல் கருப்பாக\சிவப்பாக இருக்க வேண்டும். அப்படி இல்லாவிட்டால் விண்மீன் நாளுக்கும் அடுத்த நாளுக்கும் (இறங்கு முக போக்கு) ஆன இடைவெளி அதிகமாக இருக்கவேண்டும், முடிவும் முதல் நாளை விட குறைவாக இருக்க வேண்டும்.


இதுக்கும் தலைகீழ் சுத்தியலுக்கும் என்ன வேறுபாடு? இரண்டும் தோற்றத்தில் ஒன்றே ஆனால் தலைகீழ் சுத்தியல் இறங்கு முகத்தில் தோன்றும் இது ஏறு முகத்தில் தோன்றும். தோன்றும் இடத்தை பொருத்து பெயர்.


சமிக்கையை அதிகப்படுத்தும் செயல்கள்.

* மேல் குச்சியின் நீளம் அதிமாக இருக்கவேண்டும்.
* முதல் நாளுக்கும் மீன் நாளுக்குமான இடைவெளி அதிமாக இருக்க வேண்டும்.
* மீன் நாளின் முடிவை விட அடுத்த நாளின் தொடக்கம் குறைவாக இருக்கவேண்டும்.
* அதிக வாங்கல் விற்றல் மீன் நாளில் நடந்திருந்தால் அடுத்த நாள் மாற்றம் நடக்க வாய்ப்பு மிக அதிகம்.

போக்கு மாற்றம் நடைபெறுமென்று  நினைக்க காரணம்.

ஏறுமுக போக்கின் போது முந்தின நாளுக்கும் இந்நாளுக்குமான இடைவெளி அதிகரித்து பங்கின் விலை அதிகமாக தொடங்கி ஓடி புதிய உச்சத்தை தொடும். காளையின் கட்டுப்பாடில் விலை இருக்கும். ஆனால் அன்றைய நாள் முடிவதற்குள் கரடி உள்நுழைந்து விலையை வர்த்தக வீச்சின் அளவை புதிய கட்டத்துக்கு குறைத்து விடும். இது சிறிய உடலை தோற்றுவிக்கும். மேற்கத்திய குச்சி வரைபடத்தை அலசினால் காளைகள் இன்னும் கட்டுப்பாட்டில் பங்கை வைத்திருப்பதாக தோன்றும். ஆனால் நீண்ட மேல் குச்சி பங்கை விற்பவர்கள் அதிகரித்தை காட்டும். எனினும் மேல்குச்சி விற்பவர்கள் அதிகரித்ததை காட்டுகிறது. காளைகள் விலையை நாளின் முடிவில் தொடக்க விலையை விட குறையவிடாமல் பார்த்துக்கொண்டாலும் பங்கை விற்பவர்கள் அதிகமானது தெரிகிறது. அடுத்த நாள் பங்கின் தொடக்கம் குறைந்து இருந்தாலோ கருப்பு மெலுகுவர்த்தி ஏற்பட்டாலோ விற்பது அதிகரித்து உள்ளது என்பதை உறுதிபடுத்தலாம்.

தலைகீழ் சுத்தியல் (Inverted hammer)

தலைகீழ் சுத்தியல்

ஒற்றைத்தடி ஒழுங்கான தலைகீழ் சுத்தியல் இறங்கு முக போக்கிலேயே ஏற்படும். தலைகீழ் சுத்தியலில் சிறிய உடலும் மேலே நீளமான குச்சியும் இருக்கும். உடலை விட குறைந்தது இரு மடங்கு மேல் குச்சியின்  நீளம் இருக்கும். இதன் நிறம் முக்கியமில்லை என்றாலும் கருப்பு மெழுவர்த்தியை விட வெள்ளை மெழுவர்த்தி இருந்தால் காளை ஓட்டத்திற்கு அதிக வாய்ப்பு. அடுத்த நாள் வெள்ளை மெழுவர்த்தி இருப்பது சுத்தியலின் சமிக்கையை உறுதிபடுத்தும்.

சமிக்கையை அதிகப்படுத்தும் செயல்கள்.

* உடலின் கீழுள்ள குச்சியின் நீளம் மிக அதிகமாக இருந்தால் அடுத்த நாள் மாற்றம் நடக்க வாய்ப்பு மிக அதிகம்.
* முந்தின நாள் விலை முடிவை விட அதிக கீழ் இடைவெளியில் இன்றைய நாள் தொடங்கி முடிந்தால் அடுத்த நாள் போக்கு திரும்பி விலை அதிகமாக வாய்ப்புண்டு.
* அதிக வாங்கல் விற்றல் நடந்திருந்தால் அடுத்த நாள் மாற்றம் நடக்க வாய்ப்பு மிக அதிகம்.
* தலைகீழ் சுத்தியல் ஏற்பட்ட பின் அடுத்த நாள் தொடக்கம் முந்தின நாள் முடிவை விட அதிகமாக இருக்கவேண்டும்.

ஏன் இந்த ஒழுங்கு வேலை செய்யும் என்று நினைக்கிறார்கள்?

சந்தையானது கீழ் உந்தந்தில் இருந்தால் கரடி செல்வாக்கு உள்ளதாக பொருள். அப்போது பங்கானது அதிக விலையில் (முந்தைய நாள் முடிவை விட) தொடங்கி அதிக விலையில் வர்த்தகம் நடக்கும். அதன் காரணமாக  காளைகள் உள்நுழைந்து விட்டதை அறியலாம் ஆனால் காளை தன் வலுவை கட்டுப்பாட்டில் வைக்க முடியாமல் தடுமாறும். அப்போது விற்பவர்களால் பங்கின் விலை வீழ்ந்து அதன் வீச்சின் குறை(கீழ்) விலையை எட்டுவார்கள். இதனால் கரடியின் செல்வாக்கு இன்னும் உள்ளது என்று அறியலாம். ஆனால் அடுத்த நாள் காளை நுழைந்து கரடியின் சிறு எதிர்ப்பை மீறி விலையை அதிகரிக்கும். (வெள்ளை மெழுவர்த்தி). அடுத்த நாள் விலை கீழே இறங்காமல் வலுவாக இருந்தால் தலைகீழ் சுத்தியல் சமிக்கை உறுதியானதாக பொருள்.

தொங்கும் மனிதன் (Hanging man)

தொங்கும் மனிதன்

ஒற்றை உலக்கை ஒழுங்கான தொங்கும் மனிதன் ஏறுமுகமான போக்கிலேயே ஏற்படும். இது கரடி ஒழுங்காகும். சுருக்கமாக ஏறுமுக போக்கில் தோன்றும் சுத்தியலே தொங்கும் மனிதன். இதற்கு மேல் குச்சி இருக்காது இருந்தாலும் மிகச்சிறியதாக இருக்கும். இதன் உடல் சிறிதாக இருக்கும் . உடலின் நிறம் கருப்பாகவோ\சிகப்பாகவோ வெள்ளையாகவோ\பச்சையாகவோ இருக்கலாம். போக்கை மாற்றக்கூடிய தன்மையுடையது என்பதால் அடுத்த நாள் வணிகம் இதை உறுதிபடுத்த வேண்டும். முதல் நாள் தொடக்கம் & முடிவை விட அடுத்த நாள் முடிவு கீழே இருக்க வேண்டும். கீழ் குச்சியின் நீளம் குறைந்தது உடலை விட இரு மடங்கு இருக்கவேண்டும்.

இதுக்கும் சுத்தியலுக்கும் என்ன வேறுபாடுன்னா சுத்தியல் இறங்குமுகத்தில் தோன்றுவது அதே ஏறுமுகத்தில் தோன்றினால் அதை தொங்கும் மனிதன் என்பர்.

சமிக்கையை அதிகப்படுத்தும் செயல்கள்.

* உடலின் கீழுள்ள குச்சியின் நீளம் மிக அதிகமாக இருந்தால் அடுத்த நாள் மாற்றம் நடக்க வாய்ப்பு மிக அதிகம்.
* தொங்கும் மனிதன் அன்று அதிக வாங்கல் விற்றல் நடந்திருந்தால் அடுத்த நாள் மாற்றம் நடக்க வாய்ப்பு மிக அதிகம்.
* தெளிவான ஏறு முகத்தில் தோன்றினால்  மாற்றம் நடக்க வாய்ப்பு அதிகம்.

ஏன் இந்த ஒழுங்கில் போக்கு மாற்றம் நிகழும் என்று நினைக்கிறார்கள்?

ஏறுமுகத்தில் தோன்றும் தொங்கும் மனிதன் வாங்குபவர்களின் (காளை) வலிமை குறைந்ததை  காட்டுகிறது. அதே நேரம் தேவை அதிகரித்து பங்கின் விலை அதிகரிக்கும், அந்நாளில் குறிப்பிடத்தக்க அளவு விற்பதுவும்  நடக்கும். வாங்குபவர்கள் (காளை) முடிவு விலையை தொடக்க விலைக்கு அருகில் ஒரு வாராக சமாளித்து கொண்டுவருவர். முதலில் ஏற்பட்ட அதிக விற்பனை பெருமளவு முதலீட்டாளர்கள் பங்கு அதிகபட்ச விலையை தொட்டுவிட்டதாக நினைப்பதின் அறிகுறியாகும்.

வரைபடத்தை நோக்கினால் அடிக்கடி தொங்கும் மனிதன் இருப்பதை கவனிக்கலாம். அவற்றின் பங்கு வாங்கல் விற்றல் குறைவாக இருக்கும். கீழ் குச்சியின் நீளம் மிக அதிகமாக இருந்து அந்நாளில் பங்கு வாங்கல் விற்றல் மிக அதிகமாக இருந்து அடுத்த நாள் விற்பனை அதிகமாக இருந்தால் (கருப்பு\சிவப்பு நிற உடல்) மாற்றம் ஏற்பட மிக அதிக வாய்ப்புண்டு.

சுத்தியல் Hammer (பங்கு வணிகம்)

நுட்ப அலசலில் மெழுகுவர்த்தி வரைபடத்தை கொண்டு சுத்தியல் ஒழுங்கும்  மற்ற ஒழுங்குகளும் எப்படி இயங்குகிறது என்று பார்ப்போம்.  ஒழுங்கை மட்டும் வைத்துக்கொண்டு கோதாவில் இறங்குவது முட்டாள்தனம். கூட சில காட்டிகளை வைத்து ஒழுங்கு சரியான பாதையில் கணிப்பின் படி போகுதான்னு பார்க்கனும். ஏகப்பட்ட காட்டிகள் இருக்கு, அவரவருக்கு உகந்த நாலு அல்லது ஐந்து காட்டிகளோடு ஒப்பிடுவது சிறப்பு. அப்படி பார்த்தாலும் வெற்றி உறுதியில்லை ஆனா வாய்ப்பு அதிகம். ஒன்றும் பார்க்காமல் பங்கை வாங்கி\விற்பதை விட பார்த்து வாங்கி\விற்பது நல்லது, பலன் அதிமிருக்கும்,

சுத்தியல் 

ஒற்றை உலக்கை ஒழுங்கான சுத்தியல்  இறங்கு முக போக்கிலேயே தோன்றும். இது பங்கு காளை ஓட்டத்தை ஓட ஆரம்பிக்கும் தொடக்கம் ஆகும். சுத்தியலின் கீழ் குச்சி உடலின் நீளத்தைப் போல்  குறைந்தது இரு மடங்காவது இருக்க வேண்டும். சுத்தியலின் மேல் குச்சி இருக்கக்கூடாது அல்லது மிகச்சிறிதாக மட்டும் இருக்கலாம். இதன் நிறம் முக்கியமில்லை என்றாலும் கருப்பு மெழுவர்த்தியை \உடலை விட வெள்ளை மெழுவர்த்தி\உடல் இருந்தால் காளை ஓட்டத்திற்கு அதிக வாய்ப்பு. அடுத்த நாள் வெள்ளை மெழுவர்த்தி\உடல் இருப்பது சுத்தியலின் சமிக்கையை உறுதிபடுத்தும்.

 
கருப்பும் சிகப்பும் ஒன்று (மாறி மாறி பயன்படுத்தப்படும்) 
வெள்ளையும் பச்சையும் ஒன்று (மாறி மாறி பயன்படுத்தப்படும்) 

சமிக்கையை அதிகப்படுத்தும் செயல்கள்.

* உடலின் கீழுள்ள குச்சியின் நீளம் மிக அதிகமாக இருந்தால் அடுத்த நாள் மாற்றம் நடக்க வாய்ப்பு மிக அதிகம்.
* சுத்தியல் அன்று அதிக வர்தகம் நடந்திருந்தால் அடுத்த நாள் மாற்றம் நடக்க வாய்ப்பு மிக அதிகம்.
* முதல் நாளின் விலை முடிவை விட அதிக கீழ்நோக்கிய இடைவெளியில் அந்நாள் பங்கின் விலை தொடக்கம் இருந்து அடுத்த நாள் பங்கின் விலை தொடக்கம் உயர்ந்து இருந்தால் விலை மாறுபாடு உறுதியாக நடப்பதற்கான வாய்ப்பு அதிகம்.
* தெளிவான இறங்கு முகத்தில் தோன்றினால்  மாற்றம் நடக்க வாய்ப்பு அதிகம்.

ஏன் மாற்றம் நடக்கும் என எண்ணுகிறோம்?

சந்தையானது கீழ் உந்தந்தில் இருந்தால் கரடி செல்வாக்கு உள்ளதாக பொருள். அப்போது பங்கானது அதிக விலையில் (முந்தைய நாள் முடிவை விட) தொடங்கி குறைவான விலையில் வர்த்தகம் நடக்கும். எனினும் பங்கை விற்பது நின்று பின் காளையின் செல்வாக்கு மிகுந்து அதிக விலைக்கு வாங்குவது நடக்கும். இந்த விலையானது வணிகவீச்சின் மேல் பகுதியை உருவாக்கும். இதனால் சிறிய உடலும் நீண்ட கீழ் குச்சியும் உருவாகும். இது கரடியின் கட்டுப்பாடு தளர்வதை குறிக்கிறது. நீண்ட கீழ் குச்சி கரடியின் செல்வாக்கு இன்னும் உள்ளதா என்ற கேள்வியை எழுப்புகிறது. போக்கு மாறுவதை  குறிக்கும் உறுதிபடுத்தும் செயல் அடுத்த நாள் பங்கு அதிகவிலைக்கு தொடங்கி அதிக விலையில் முடிவதாகும். 

கலைச்சொற்கள் :-

உலக்கை Candle stick 
உந்தம் Momentum 
ஒழுங்கு Pattern 
போக்கு Trend 
குச்சி Shadow or tick
உடல் Body 
வீச்சு Range 

பிணி போக்கும் தன்வந்திரி திருமந்திரம்

எல்லா பிணியும் நீங்க 108 முறை இந்த தன்வந்திரி திருமந்திரத்தை ஓதவும்.

 ஓம் பகலவனே கோவிந்தனே;
 தந்வந்திரியே மருந்து கலனை உடையவனே;
எல்லா பிணிகளையும் போக்குபவனே ;
மூவுலகின் கோவே திருமாலே போற்றி! போற்றி

மரூர்பட்டி பாலதண்டாயுதபாணி கோவில் வரலாறு

மரூர்பட்டி பாலதண்டாயுதபாணி (பழனியாண்டவர்) கோவில் தல வரலாறு (தல புராணம்) அசித் புராணமல்ல :) 😉

வெள்ளக்கோவிலுள்ள வீரகுமார சாமி தன் எல்லைக்குட்பட்ட மக்கள் நலமாக உள்ளார்களா என்று அறிய திங்கள் தோறும் நாட்டில் எல்லா இடங்களுக்கும் உலா செல்வது வழக்கம். அப்படி வரும் போது ஒரு முறை நாமக்கலுக்கு அருகிலுள்ள மரூர்பட்டியில் திரளாண மக்கள் சாமியின் வருகையை எதிர்பார்த்து கூடியிருந்தனர். சாமி அவர்களிடம் எதற்காக கூடியுள்ளீர்கள் என்று வினவினார். அவர்கள் சாமி வெள்ளக்கோவில் இங்கிருந்து வெகு தொலைவில் உள்ளது அதனால் உன் ஆலயத்திற்கு மாதம் ஒரு முறை கூட வரமுடிவதில்லை. ஆகையால் இங்கு எழுந்தருள வேண்டும் என வேண்டினர். அதற்கு சாமி வீரக்குமார சாமியாக வெள்ளக்கோவிலில் எழுந்தருளுவேன் என பக்தருக்கு வாக்கு கொடுத்ததன் காரணமாக வேறு ஊர்களில் தான் எழுந்தருள முடியாது என்றும், தான் வேலவனின் இறங்குகை என்றும் அதனால் பழனியாண்டவர் ஆலயத்தை நிறுவி வழிபடச் சொன்னார். அப்போது கூட்டத்திலிருந்த குப்பண்ணக் கவுண்டர் என்ன இருந்தாலும் தங்களை தரிசிப்பது போல் ஆகுமா என்றார். இந்த இறங்குகையில் தான் பெண்களை கோவிலில் பார்ப்பதில்லை என்று வாக்கு கொடுத்திருப்பதால் அவர்கள் என் ஆலயத்தின் உள் வரமாட்டார்கள் ஆனால் அவர்களின் வேண்டுதலுக்கு இரு மடங்கு பலன் கொடுப்பேன், ஆனால் பழனியாண்டவர் கோவிலுக்கு இருபாலரும் வரலாம் என்று கூறி பழனியாண்டவரை ஏற்பாடு செய்ய கூறினார். அப்போதும் கூட்டத்திலிருந்த செல்லமுத்து கவுண்டர் என்ன இருந்தாலும் உங்களை வழிபடுவது தான் பிடித்துள்ளது என்றார். அதற்கு சாமி என் உருவத்தை வரைந்து வேல் சாட்டை பிரம்பு முதலியவற்றை வைத்து கும்பிடுங்கள் என்றார் வேல் சாட்டை முதலியவற்றை ஆண்டுக்கு ஒரு முறை நொய்யலில் குளிப்பாட்டி வெள்ளக்கோவிலுள்ள தன் ஆலயத்திற்கு மகா சிவராத்திரி காலத்தில் காவடியுடன் கொண்டுவரச் சொன்னார் சாமியின் உருவப்படத்தை பெண்களும் வழிபடலாம் என்பதால் சாமியின் தீர்ப்பு அனைவருக்கும் உகந்ததாக இருந்தது.

வெள்ளக்கோவிலில் உள்ள வீரக்குமார் சாமி சிலை

வெள்ளக்கோவிலில் உள்ள கோவில் முதன்மை வாயிலை தாண்டியதும்

வீரக்குமார் கோவிலில் உள்ள மண் குதிரைகள்

வீரக்குமார் கோவிலில் இருந்த மகாமுனி (தற்போது கோவிலுக்கு வெளியே உள்ளது)

வீரக்குமார் கோவில் மகா சிவராத்திரி தேர்

வீரக்குமார் சாமி உருவம் (ஓவியம்)

பழனியாண்டவர் அலங்காரத்தில்

பழனியாண்டவர்